श्रीवर्धन पोलिसांचा गुन्हेगारांवर वचक; प्रतिबंधात्मक कारवायांचा धडाका!

श्रीवर्धन, प्रतिनिधी : अनिकेत मोहित

श्रीवर्धन तालुक्यात कायदा व सुव्यवस्था अबाधित राखण्यासाठी तसेच गुन्हेगारी प्रवृत्तींना आळा घालण्यासाठी श्रीवर्धन पोलीस प्रशासनाने प्रतिबंधात्मक कारवाईचा धडाका सुरू ठेवला आहे. पोलीस निरीक्षक सुरेंद्र गरड यांच्या नेतृत्वाखाली सराईत गुन्हेगारांवर लक्ष ठेवण्यासोबतच अवैध धंदे, जुगार, सट्टा आणि बेकायदा दारू व्यवसायाविरोधात कारवाई केली जात आहे. उपलब्ध आकडेवारीनुसार, जानेवारी ते सप्टेंबर २०२६ या कालावधीत विविध कलमांखाली २४३ प्रतिबंधात्मक कारवाया करण्यात आल्या आहेत. मागील वर्षी याच कालावधीत १४२ कारवाया झाल्या होत्या.

तडीपारीच्या कारवाईतून गुन्हेगारांवर वचक

सराईत गुन्हेगारांच्या हालचालींवर लक्ष ठेवून महाराष्ट्र पोलीस कायद्यातील कलम ५६ अंतर्गत तडीपारीची कारवाई केली जाते. उपलब्ध माहितीनुसार, सात जणांविरोधात हद्दपारीची प्रक्रिया सुरू करण्यात आली होती, त्यापैकी पाच जणांवरील तडीपारीची कारवाई सध्या लागू असल्याचे नमूद करण्यात आले आहे. अशा कारवाईमुळे वारंवार गुन्हे करणाऱ्या व्यक्तींवर नियंत्रण ठेवण्यास आणि परिसरातील शांतता राखण्यास मदत होते.

अवैध दारूधंदे, जुगार-सट्ट्याविरोधात मोहीम

तालुक्यात अवैध दारू विक्री आणि निर्मिती करणाऱ्यांविरोधातही पोलिसांकडून कारवाई केली जात आहे. जुगाराचे अड्डे भरवणारे आणि सट्ट्याचा व्यवसाय करणारे यांच्यावर कायद्यानुसार कारवाईचा बडगा उगारण्यात येत आहे. वारंवार गुन्हे दाखल असलेल्या व्यक्तींवर विशेष लक्ष केंद्रित केले जात असून, महाराष्ट्र दारूबंदी कायद्यातील कलम ९३ अंतर्गत प्रतिबंधात्मक कारवाईचाही वापर केला जात आहे.

शांतताभंग रोखण्यासाठी प्रतिबंधात्मक पावले

भारतीय नागरिक सुरक्षा संहिता (BNSS) कलम १२६ अंतर्गत संभाव्य शांतताभंग रोखण्यासाठी प्रतिबंधात्मक प्रक्रिया केली जाते. संबंधित व्यक्तीकडून शांतता राखण्याची हमी घेण्याची कार्यवाही या प्रक्रियेत होऊ शकते. श्रीवर्धन पोलिसांनी सप्टेंबर २०२६ मध्ये या कलमाखाली ३६ कारवाया केल्या असून, विविध कलमांखाली महिन्यात एकूण ३७ प्रतिबंधात्मक कारवायांची नोंद आहे.

गणेशोत्सव, गोपाळकाला आणि दसऱ्याचे चोख नियोजन

गणेशोत्सव आणि गोपाळकाला उत्सवाच्या काळात गर्दी, मिरवणुका आणि वाहतुकीचे नियोजन करून पोलिसांनी चोख बंदोबस्त ठेवला होता. त्याचप्रमाणे दसरा उत्सवही शांततेत आणि सुरक्षित वातावरणात पार पडावा, यासाठी श्रीवर्धन पोलिसांनी विशेष नियोजन केले होते. सणाच्या पार्श्वभूमीवर गर्दीच्या ठिकाणी गस्त, वाहतूक नियंत्रण, संशयास्पद हालचालींवर लक्ष आणि कायदा व सुव्यवस्थेचा आढावा अशा उपाययोजनांवर भर देण्यात आला. उत्सवाच्या काळात कोणताही अनुचित प्रकार घडू नये आणि नागरिकांना सुरक्षित वातावरणात सण साजरा करता यावा, यासाठी पोलिसांनी दक्षता घेतली.

पर्यटन हंगामातही पोलिसांची विशेष दक्षता

सध्या पर्यटन हंगाम सुरू असल्याने समुद्रकिनारे आणि प्रमुख पर्यटनस्थळांवर पर्यटकांची गर्दी वाढत आहे. या पार्श्वभूमीवर पोलीस प्रशासनाकडून बंदोबस्त वाढविणे, वाहतूक कोंडी टाळणे, वाहन तपासणी करणे, पार्किंग व्यवस्थेवर लक्ष ठेवणे आणि गर्दीच्या ठिकाणी गस्त घालणे अशा उपाययोजना केल्या जात आहेत.

पोलीस निरीक्षक सुरेंद्र गरड यांच्या नेतृत्वाखाली प्रतिबंधात्मक कारवाई, सण-उत्सवांचे नियोजन आणि पर्यटन काळातील वाहतूक व्यवस्थापन यावर भर दिला जात आहे. गुन्हे घडल्यानंतर कारवाई करण्याबरोबरच संभाव्य गुन्हे रोखण्यासाठी आधीच पावले उचलण्याच्या या धोरणामुळे श्रीवर्धन तालुक्यात शांतता व सुव्यवस्था राखण्यास मदत होत आहे.