हरिहरेश्वरमध्ये मध्यरात्री नागरी वस्तीत मगर; वनविभागाकडून सुरक्षित रेस्क्यू

अनिकेत मोहित / श्रीवर्धन शहर  

श्रीवर्धन तालुक्यातील प्रसिद्ध तीर्थक्षेत्र हरिहरेश्वर येथे सोमवारी (दि. १९) मध्यरात्री सुमारे दोन वाजण्याच्या सुमारास नागरी वस्तीत मगर आढळून आल्याने परिसरात खळबळ उडाली. अचानक मगरीचे दर्शन झाल्याने नागरिकांमध्ये सतर्कतेचे वातावरण निर्माण झाले. मात्र, ग्रामस्थांनी प्रसंगावधान राखत तातडीने वनविभागाला माहिती दिली. त्यानंतर घटनास्थळी दाखल झालेल्या वनविभागाच्या पथकाने ग्रामस्थांच्या सहकार्याने मगरीला सुरक्षितपणे पकडून तिच्या नैसर्गिक अधिवासात सोडले.

हरिहरेश्वर हे धार्मिक आणि पर्यटनाच्या दृष्टीने महत्त्वाचे ठिकाण असून, या परिसरात निसर्गसंपन्न वातावरणामुळे विविध प्रकारचे वन्यजीव आढळून येतात. सोमवारी मध्यरात्री नागरी वस्तीत मगर आढळल्याची माहिती समोर येताच ग्रामस्थांनी सतर्कता दाखवली. मगरीला पकडण्याचा स्वतःहून प्रयत्न न करता वनविभागाशी संपर्क साधण्यात आला. माहिती मिळताच वनविभागाचे पथक घटनास्थळी दाखल झाले आणि परिस्थितीचा आढावा घेत बचावकार्य सुरू केले.

वनविभागाच्या कर्मचाऱ्यांनी ग्रामस्थांच्या सहकार्याने मगरीला सुरक्षितपणे रेस्क्यू केले. या कारवाईदरम्यान नागरिकांच्या सुरक्षिततेसह वन्यजीवाला कोणतीही इजा होऊ नये, याची विशेष काळजी घेण्यात आली. रेस्क्यू करण्यात आलेली मगर पूर्ण वाढ झालेली आणि सुदृढ असल्याचे आढळून आले. त्यानंतर आवश्यक ती कार्यवाही करून मगरीला तिच्या नैसर्गिक अधिवासात सुरक्षितपणे सोडण्यात आले.

वन्यजीव दिसल्यास सावधानता बाळगा!

नागरी वस्तीत मगर किंवा अन्य वन्यजीव आढळल्यास नागरिकांनी घाबरून न जाता सतर्कता बाळगणे आवश्यक आहे. अशा वेळी संबंधित वन्यजीवाच्या जवळ जाणे, त्याला पकडण्याचा प्रयत्न करणे, दगड मारणे किंवा गर्दी करून त्याला त्रास देणे धोकादायक ठरू शकते. त्यामुळे नागरिकांनी सुरक्षित अंतर राखून तातडीने वनविभागाला माहिती द्यावी. वन्यजीवांचे संरक्षण आणि मानवी सुरक्षितता या दोन्ही बाबी महत्त्वाच्या असल्याने अशा घटनांमध्ये नागरिकांनी वनविभागाला सहकार्य करणे गरजेचे आहे.

हरिहरेश्वर येथे मध्यरात्री घडलेल्या या घटनेत ग्रामस्थांनी दाखवलेली सतर्कता आणि वनविभागाने केलेली तत्पर कारवाई यामुळे मगरीला सुरक्षितपणे नैसर्गिक अधिवासात सोडणे शक्य झाले. मानव आणि वन्यजीव यांच्यात संघर्ष निर्माण होऊ नये, यासाठी नागरिकांनी जबाबदारीने वागावे, असे आवाहन करण्यात येत आहे.