महाड एम.आय.डी.सी प्रिव्ही कंपनी जवळ मोटारसायकलचा अपघात / अपघाता मध्ये एका तरुणाचा जागीच मृत्यू

नितेश पवार – ग्रामीण प्रतिनिधी बिरवाडी

महाड:- महाड एम.आय.डी.सी मधील प्रिव्ही ऑरगॅनिक कंपनी समोर दि. २८ जुलै रोजी सायंकाळी पाच वाजन्याच्या सुमारास ज्ञानेश्वर प्रभाकर फडतरे व वर्षा फडतरे राहणार प्रभात कॉलनी महाड हे आपल्या स्कुटी वरून बिरवाडी कडून महाडच्या दिशेने जात असताना अवजड वाहनाखाली आल्याने अपघात झाला, यामध्ये ज्ञानेश्वर फडतरे यांचा जागीच मृत्यू झाला तर वर्षा फडतरे जखमी झाल्या असून उपचारासाठी प्राथमिक आरोग्य केंद्र येथे हलवण्यात आले, अपघाताचा पुढील अधिक तपास महाड एमआयडीसी पोलीस करीत आहेत.

गेली कित्येक वर्षांपासून एम.आय.डी.सी अंतर्गत असणारा रस्ता नादुरुस्त असून दरवर्षी मलमपट्टी लावण्याचे काम एम.आय.डी.सीकडून केले जात आहे, यामुळे वारंवार होणाऱ्या अपघातांच्या मालिका सुरूच असून स्थानिकांकडून आंदोलन करून निवेदने देण्यात आलेआहे, परंतु कोणतीही दखल एम.आय.डी.सी व अधिकारी गांभीर्याने घेत नसल्याचे दिसत आहे, सतत अवजड वाहनांची रहदारी असताना देखील प्रिव्ही कंपनीची वाहने रस्त्यालगत पार्किंग केली जात आहेत, काही दिवसांपूर्वी महाड एम.आय.डी.सी पोलीस ठाण्याचे सहाय्यक पोलीस निरीक्षक मारुती आंधळे यांच्या आदेशाने एम.आय.डी.सी मधील रोड शेजारील पार्किंग करणाऱ्या वाहनांवरती दंडात्मक कारवाई करण्यात आलेली असताना देखील पुन्हा प्रिव्ही कंपनीकडून त्या नियमांचे उल्लंघन केल्याचे दिसत आहे, यामुळे नागरिकांमध्ये संतापाची भावना निर्माण झाली असून लवकरात लवकर एम.आय.डी.सी ने रस्त्याचे काम कायमस्वरूपी करावे व रस्त्यालगतची होणारी वाहन पार्किंग बंद करावी अशा प्रकारची मागणी येथील स्थानिक नागरिक करीत आहेत.