मृदुंगाच्या गजरात गौरी-गणपतीला भावपूर्ण निरोप

श्रीवर्धन प्रतिनिधी- अनिकेत मोहित

श्रीवर्धन: पाच दिवस भक्तांच्या घरी विराजमान झालेल्या गौरी-गणपतीला आज श्रीवर्धनमध्ये भक्तिमय आणि भावपूर्ण वातावरणात निरोप देण्यात आला. मृदुंगाच्या गजरात, गणपती बाप्पा मोरयाच्या जयघोषात लहानांपासून थोरांपर्यंत सर्वजण या विसर्जन सोहळ्यात सहभागी झाले होते. बाप्पाला निरोप देताना अनेकांच्या डोळ्यांत अश्रू तरळले होते.

गौरी-गणपतीच्या आगमनापासून गेल्या पाच दिवसांपासून श्रीवर्धनमधील घरोघरी उत्साह, भक्ती आणि आनंदाचे वातावरण होते. सकाळ-संध्याकाळ आरती, भजन आणि पारंपरिक धार्मिक विधींमुळे परिसर भक्तिमय झाला होता. आज विसर्जनाच्या दिवशीही घराघरांत गणरायाची मनोभावे पूजा करून कुटुंबाच्या सुख, समृद्धी, समाधान आणि आरोग्यासाठी प्रार्थना करण्यात आली.

यानंतर ढोल-ताशांचा गोंगाट न करता पारंपरिक मृदुंगाच्या गजरात आणि भजनाच्या वातावरणात गणरायाला विसर्जनासाठी समुद्रकिनारी नेण्यात आले. ‘गणपती बाप्पा मोरया, पुढच्या वर्षी लवकर या’ या जयघोषाने समुद्रकिनारा दुमदुमून गेला. बाप्पाच्या चरणी मनोभावे नतमस्तक होत भक्तांनी आपल्या लाडक्या गणरायाला भावपूर्ण निरोप दिला.

विसर्जनाचा क्षण जवळ येताच भक्तांच्या चेहऱ्यावर आनंदासोबतच विरहाची भावनाही स्पष्ट दिसत होती. पाच दिवस घरात राहिलेल्या बाप्पाला निरोप देताना लहानांपासून ज्येष्ठांपर्यंत अनेकांचे डोळे पाणावले. भक्ती, श्रद्धा आणि भावनेने भारलेल्या या वातावरणात गणरायाचे विसर्जन करण्यात आले.

‘गणपती बाप्पा मोरया… पुढच्या वर्षी लवकर या!’ या जयघोषात बाप्पाला निरोप देताना आता पुन्हा पुढील वर्षी गणरायाच्या आगमनाची प्रतीक्षा करावी लागणार असल्याची हुरहूर प्रत्येक भक्ताच्या मनात होती. श्रीवर्धनमध्ये पाच दिवस रंगलेला गौरी-गणपतीचा उत्सव अशा प्रकारे भक्तिमय आणि भावपूर्ण वातावरणात संपन्न झाला.