नगरविकास मंत्री एकनाथ शिंदे यांनी केली जे.एन.पी.टी. सिडको परिसराची पाहणी

संदेश चौधरी – संपादक कोकण विभाग

बेलापूर–जे.एन.पी.टी. रस्त्यावर वाहनांची होणारी वाहतूक कोंडी व पार्किंग प्रश्न यावर लवकरात लवकर उपाययोजना करून याबाबतच्या अडचणी सोडविण्यासंदर्भात संबधित विभागाला नगरविकास मंत्री एकनाथ शिंदे यांनी आज येथे निर्देश दिले.

नगरविकास मंत्री एकनाथ शिंदे यांनी बुधवार दि. 29 सप्टेंबर रोजी शिवस्मारक, जे.एन.पी.टी. उरण येथील दास्तान फाटा, द्रोणागिरी सीएफएस येथील पार्किंगच्या जागेची पाहणी केली. त्यावेळी त्यांनी संबंधित विभागाला ठाणे–बेलापूर रस्त्यावरील सिडको वजे.एन.पी.टी. कडे जाणाऱ्या व येणाऱ्या वाहनांची होणारी ट्राफिक कोंडी तसेच पार्किंग प्रश्न यावर करावयाच्या उपाययोजना याबाबत आवश्यक ते निर्देश दिले.

यावेळी नगरविकास मंत्री एकनाथ शिंदे म्हणाले की, सिडको जेएनपीटी आणि वाहतूक पोलीस यांच्या मदतीने नियोजन करणे आवश्यक आहे. याकरिता टप्य्याटप्प्याने वाहने सोडण्यात येणार असून सीएफएस आणि तालुक्याबाहेर जाणाऱ्या वाहनांना कलर कोड स्टिकर देण्यात येतील. ठाणे, रायगड आणि पालघर जिल्ह्यात होणाऱ्या वाहतूक कोंडीचा त्रास भेडसावत आहे. मात्र वाहतूक कोंडीची समस्या सोडविण्यासाठी समन्वय पथक तयार करण्यात आले आहे. त्याचबरोबर जेएनपीटी आणि दास्तान येथील पार्किंगच्या जागेमध्ये वाहनांची नियोजनबध्द पार्किंग व्यवस्था करण्याचा प्रयत्न केला जाईल.

यावेळी माजी आमदार मनोहर भोईर, विश्वस्त जे.एन.पी.टी. दिनेश पाटील, नरेश रहाळकर, संतोष ठाकूर, महादेव घरत, सदानंदराव भोसले, बी.एन. डाकी, गणेश शिंदे, विनोद म्हात्रे, प्रदीप ठाकूर, के.एम. घरत, अमित भगत, संदेश पाटील, जि.प. सदस्य विजय भोईर, पं.स. सदस्य दिपक ठाकूर, पं.स. सदस्य हिराजी घरत, नितेश पाटील, हितेश पाटील, रमेश म्हात्रे, सौ. ममता पाटील, सौ.ज्योती म्हात्रे, सौ. भावना म्हात्रे, सुजाता गायकवाड, तहसिलदार भाऊसाहेब अंधारे, सिडकोचे अधिकारी, जे.एन.पी.टी. चे अधिकारी, पोलीस अधिकारी, सरपंच, ग्रामपंचायत सदस्य तसेच नागरिक मोठ्या संख्येने उपस्थित होते.