गणेशोत्सव २०२६: मुंबई-गोवा महामार्गावर १६ टनांवरील अवजड वाहनांना बंदी; वाहतूक पोलिसांचा निर्णय

सचिन चांदोरकर – उपसंपादक महाराष्ट्र राज्य 

मुंबई/रत्नागिरी: गणेशोत्सवासाठी कोकणात जाणाऱ्या भाविकांचा प्रवास सुखकर व्हावा आणि मुंबई-गोवा राष्ट्रीय महामार्गावर (क्र. ६६) वाहतूक कोंडी टाळता यावी, यासाठी प्रशासनाने मोठा निर्णय घेतला आहे. सणकाळात १६ टन किंवा त्यापेक्षा अधिक वजनक्षमता असलेल्या जड आणि अवजड वाहनांच्या वाहतुकीवर विविध टप्प्यांत पूर्णतः बंदी घालण्यात आली आहे.

वाहतूक बंदीचे टप्पे व वेळापत्रक:

गणेशोत्सवपूर्व तयारी व मूर्ती आगमन: ११ सप्टेंबर २०२६ (मध्यरात्री १२.०१ पासून) ते १५ सप्टेंबर २०२६ (रात्री ११.०० पर्यंत).

५ दिवसांचे गणपती विसर्जन: १८ सप्टेंबर २०२६ (सकाळी ८.०० ते रात्री ११.०० वाजेपर्यंत).

गौरी-गणपती व ७ दिवसांचे विसर्जन: १९ सप्टेंबर २०२६ (सकाळी ८.००) ते २० सप्टेंबर २०२६ (रात्री ११.०० वाजेपर्यंत).

अनंत चतुर्दशी (१२ दिवसांचे विसर्जन): २५ सप्टेंबर २०२६ (सकाळी ८.००) ते २६ सप्टेंबर २०२६ (रात्री ८.०० वाजेपर्यंत).

या कालावधीत १६ टनांपेक्षा जास्त वजन असलेल्या ट्रक, मल्टी-ॲक्सल, ट्रेलर्स आणि लॉरीसारख्या वाहनांना महामार्गावरून प्रवास करता येणार नाही.

या वाहनांना बंदीतून सवलत:

अत्यावश्यक सेवा: दूध, पेट्रोल, डिझेल, एलपीजी गॅस, औषधे, लिक्विड मेडिकल ऑक्सिजन, अन्नधान्य, भाजीपाला आणि इतर नाशवंत/जीवनावश्यक वस्तूंची वाहतूक करणारी वाहने.

पोर्ट व आयात-निर्यात: जेएनपीटी (JNPT) आणि जयगड बंदरातून मालवाहतूक करणारी वाहने.

आणीबाणी सेवा: पोलीस, अग्निशमन दल, रुग्णवाहिका आणि आपत्ती व्यवस्थापनाची वाहने.

महामार्ग कामे: मुंबई-गोवा महामार्गाच्या रुंदीकरणासाठी व दुरुस्तीसाठी साहित्य वाहून नेणाऱ्या वाहनांना सवलत असेल. मात्र, त्यासाठी त्यांना वाहतूक पोलीस किंवा महामार्ग पोलिसांकडून विशेष ‘प्रवेशपत्र’ (Pass) घेणे बंधनकारक राहील.

महामार्गावर वाहतूक व्यवस्था सुरळीत राहावी यासाठी अतिरिक्त पोलीस बंदोबस्त तैनात करण्यात आला असून, गणेशभक्तांनी प्रवासाचे नियोजन करताना या वेळापत्रकाची नोंद घ्यावी, असे आवाहन प्रशासनाकडून करण्यात आले आहे.