श्रीवर्धनमध्ये दीड दिवसाच्या बाप्पाचे थाटात विसर्जन; भजन, टाळ-मृदुंगाच्या गजरात पारंपरिक पद्धतीने गणरायाला निरोप
अनिकेत मोहित / श्रीवर्धन शहर
श्रीवर्धन : गणेशोत्सवाच्या भक्तिमय वातावरणात श्रीवर्धनमध्ये दीड दिवसांच्या गणरायाचे पारंपरिक पद्धतीने थाटात विसर्जन करण्यात आले. गणेशमूर्ती डोक्यावर घेऊन भक्तिभावाने समुद्रकिनारी असलेल्या विसर्जनस्थळी नेण्यात आली. यावेळी वाटेत भजन, टाळ-मृदुंगाचा गजर आणि ‘गणपती बाप्पा मोरया, पुढच्या वर्षी लवकर या’च्या जयघोषाने परिसर भक्तिमय झाला होता.
गणेश चतुर्थीच्या दिवशी घरोघरी विधिवत प्रतिष्ठापना झालेल्या बाप्पाच्या पूजनानंतर दीड दिवसांनी विसर्जनाची तयारी करण्यात आली. पारंपरिक पद्धतीनुसार गणेशमूर्ती डोक्यावर घेऊन भक्त समुद्रकिनारी विसर्जनस्थळी पोहोचले. या वेळी कोणताही गाजावाजा न करता भक्तिमय वातावरणात भजन म्हणत गणरायाला निरोप देण्यात आला.
भजन मंडळींच्या सुरेल भजनाला टाळ-मृदुंगाची साथ लाभली. ‘गणपती बाप्पा मोरया’च्या जयघोषात भक्तांनी आपल्या लाडक्या गणरायाचे दर्शन घेतले. पारंपरिक पद्धतीने मूर्ती डोक्यावर घेऊन समुद्रकिनाऱ्याकडे जाणारे भक्त आणि त्यासोबत सुरू असलेले भजन यामुळे श्रीवर्धनच्या गणेशोत्सवातील जुन्या परंपरेचे मनोहारी दर्शन घडले.
दीड दिवसांच्या मुक्कामानंतर बाप्पाला निरोप देताना भक्तांच्या डोळ्यांत भावूकता होती. भक्तिभाव, श्रद्धा आणि पारंपरिक संस्कृतीचा सुंदर संगम साधत श्रीवर्धनमध्ये दीड दिवसांच्या गणरायाचे विसर्जन शांततापूर्ण आणि भक्तिमय वातावरणात पार पडले.
‘गणपती बाप्पा मोरया… पुढच्या वर्षी लवकर या!’ या जयघोषाने समुद्रकिनारा दुमदुमून गेला आणि भक्तांनी आपल्या लाडक्या बाप्पाला भावपूर्ण निरोप दिला.
